تمام مسیحی غریب نہیں ہوتے۔مُقدس یعقُوب نے اِس بات کو اُجاگر کیا ہے کہ کس طرح پہلی صدی کے غریب اِیماندار امیر کو عزت دیتے تھے اور امارت پرستی کا یہ رویہ اِبتدئی کلیسیا میں عام ہو چکا تھا جِس کی وجہ سے،  دولت مند مسیحی آزمایش میں گرنے کے خطرے سے دوچار تھے (1 تیمتھیس 6: 9-10)۔ عزت، شہرت اور دَولت پرستی اُنہیں خُدا کی مُحبّت سے دور لے جا رہی تھی۔اور زیادہ امیر ہونے کے لِئے  وہ غریب اِیمانداروں کا اِستحصال کر رہے تھے اور اپنی عیش و عشرت کے لِئے وہ غریب اِیمانداروں کی ضروریات کو نظرانداز کر رہے تھے جبکہ کچھ بنیادی دیکھ بھال کی کمی کی وجہ سے مر بھی چکے تھے۔ یہاں تک کہ کچھ امیر راہنما مالی بدعُنوانی میں بھی ملوث تھے (2 پطرس 2: 1-3)۔

تاریخ شاہد ہے کہ آج بھی دُنیا میں اگر مُعاشی بحران آتا ہے تو اُس کی وجہ بھی وہی ہوتی ہے جو مُقدس یعقُوب نے پہلی صدی میں بتائی تھی۔ جب لوگ اپنے ذاتی فائدہ کے لِئے دولت کا لالچ اور اُدھار رقم حاصل کرنا حد سے زیادہ بڑھ جاتا ہے جِس کے نتیجہ میں جائیداد، سامان اور رُوپیہ کی قدر میں کمی آ جاتی ہے اور اِس کا  بدترین اثر لاکھوں لوگوں کے اثاثہ جات کی قیمت میں کمی،  خاندانی آمدنی، اپنی عزت اور مستقبل کے لِئے اپنی اُمید سے محروم ہو جاتے ہیں۔
 مُقدس یعقُوب بحرانوں  کے نتیجے میں پیدا ہونے والی صورت حال پر حیرت انگیز روانی کے ساتھ بات کرتا ہے۔ وہ کہتا ہے کہ بحران دو مُتوازی طبقات پیدا کرتے ہیں۔ایک طرف زر کی قدر میں کمی،  بے روزگاری اور شہری بدامنی ہوتی ہے تو دوسُری طرف کچھ لوگوں کے پاس بے اِنتہا دَولت ہوتی ہے جِن کا لالچ دُوسروں کے لِئے مصیبت بن جاتا ہے جِس کی شائد اِنسانوں کو پرواہ نہ ہو لیکن خُدا کو ہے۔   وہ مظلوموں کی فریاد سُنتا ہے۔ اگرچہ قادرِمطلق خُدا اِنسان کا اِنسانوں کے ساتھ امتیازی سلوک کو براہِ راست نہیں روکتا لیکن وہ مظلوموں کی داد رسی ضُرور کرتا ہے اور اُن کو انصاف دِلاتا ہے۔ یہاں مُقدس یعقُوب امیر اِیمانداروں کو انتباہ کرتا ہے وہ لالچی اور ظالم ہیں جو مسیحی اِیمان کے منافی ہے۔

لہٰذا مذکورہ آیات ہمیں خود کا تجزیہ کرنے کی دعوت دیتی ہیں کہ ہم  یہ نہ سوچیں کہ سب ٹھیک ہے اورکچھ نہیں ہو گا بلکہ اپنی روزمرہ مسیحی زِندگی  پر غور کریں کہ کہیں ہم اَپنے دیگر اِیماندار بہن بھائیوں کے ساتھ  نااِنصافی تو نہیں کر رہے اور اگر ہمارا طرزِزندگی اِبتدائی صدی کے امیر مسیحیوں کی طرح کا ہے تو پھر سوائے رُوحانی پچھتاوے اور توبہ کے کوئی دوسرا راستہ نہیں ہے۔ آج اگر ہم اِن آیات کی روشنی میں اَپنے حالات کا عکس دیکھ رہے ہیں تو آیئے اپنے اُس گُناہ سے توبہ کر یں  تاکہ خْدا ہم پر اپنی رَحمت کو نازِل کرے اور اَپنے فضل سے ہمارے گُناہ مُعاف فرمائے۔